2012年8月2日 星期四

堅忍不拔之志

Price Performances 2012
 GLDSLVPPLTGDXGDXJFNVSLW1818.HK 2800.HK
YTD2.1% (1.5%)(0.1%)(17.8%)(22.7%)27.9% (6.2%)(21.6%) 9.3%
           
July0.8% 1.8% (2.2%)(4.3%)0.1% 8.1% 2.6% (3.5%) 1.7%
Jun2.4% (1.1%)2.2% 2.3% (0.6%)7.8% 5.3% 10.5%  5.2%
May(6.3%)(10.3%)(9.7%)(5.6%)(17.1%)(6.4%)(16.2%)(13.3%) (10.7%)
Apr(0.1%)(4.0%)(4.4%)(6.4%)(5.1%)4.4% (8.1%)(16.9%) 2.2%
Mar(1.3%)(6.5%)(2.4%)(10.6%)(12.1%)(2.7%)(13.7%)(18.5%) (4.8%)
Feb(3.0%)3.9% 5.6% (1.9%)(5.8%)(2.3%)7.8% 11.0%  6.6%
Jan11.4% 19.8% 13.8% 9.8% 20.0% 18.7% 23.0% 12.7%  10.3%
(截止八月一日)



七月在金銀方面冇大動作,只係上旬再賣咗少少金銀礦股,另金銀及相關資產佔總投資組合的比例再下降到三成。此三成為 core position,以經係底線,所以唔再減啦,一於聽天由命,唔理佢。當然,現在回想,則此少量減持亦為不智。
 
話說正當我同自己講,响依家哩個通縮危機處處,全球獨愛美元,再加上貴金屬價格一直如死蛇爛鱔般磨爛,不知何時才能見天日嘅情况吓,仍然好似我咁獨行獨斷,堅特己見,懷住「雖千萬人,吾往矣」嘅氣概,敢押上三成資產在貴金屬嘅人,實在係鳳毛麟角,自己都忍唔住為自己擁有眾人皆醉我獨醒嘅獨立精神,兼敢於去賭一鋪大嘅勇氣而自豪之際,忽然醒起…咪住....唔係啝好似有人仲狼過我!

立即上網一 check,果然不出我所料,佢真係仲狼過我,黃金佔佢隻基金總資產比例竟達五成!我講緊嘅係一隻於九十年代中响香港成立嘅對冲基金。此對冲基金一直由一個上咗岸好耐,依家純為興趣同需要(即自己嘅錢都需要管理)嘅美國佬打骰,屬於本港第一代嘅對沖基金。D題外話,哩D由上一輩嘅 fund manager 管理嘅對沖基金,先係真正嘅對沖基金,即個市大升佢雖然升少D,但市大跌時亦跌少好多(有時反而上升),總之長線係平穩向上,因為名正言順有做對冲也。反觀現時好多對冲基金, 成日俾人話:乜交易,乜策略都會做,但單單唔做對冲。市升佢升,市跌佢跌,完全失去對冲基金原始嘅意義,純萃淪為便利基金經理蠶食投資者血汗錢嘅工具。
 
講咁耐都係想話哩條友都係一個叻人,佢夠膽押下佢隻基金五成資產响黃金上。佢受嘅壓力不單係賭緊放响基金中自己嘅錢,亦要承受投資者不時嘅懷疑同質問:你真係對黃金咁有信心?賭得咁大,萬一睇錯就千年道行一朝喪。雖然面對雙重壓力,但佢就係夠膽敢做。照我知佢咁重倉買黃金已經有成年幾兩年,今年雖然暫時跑輸大市,但舊年就贏到開巷。

有云「古之立大事者,不惟有超世之才,亦必有堅忍不拔之志」。此立大事之基金經理,能縱橫對冲基金界凡廿年屹立不倒,其堅忍不拔之志,實可從其投資黃金之的過人信心及堅持體現出來。俯首自問,余未能立大事 ,實因未有堅忍不拔之志也。人哋咁有錢,一早上咗岸,但只要覺得自己嘅睇法係啱嘅,都仲敢賭舖大嘅,咁咪做大事囉;反觀自已咁鬼窮,連岸邊都仲未見到(莫講話上),本應賭得更大以求脫貧,但自己竟然經常畏首畏尾,又缺乏信心,易受外來之胡言亂語及亂象影響,未能堅持己見到底,咁就抵我窮啦!

 
現在黃金仍然被大眾看淡,回升乏力,新低有期,新高無望。我實應趁機坐言起行,鍛練出堅忍不拔之志,幹一番大事去也!

沒有留言:

張貼留言