2011年11月26日 星期六

雜談

>>前幾日有報紙專欄作家話 "金價再破頂 或等多五年"!雖然有個 "或",但都夠嚇死人。十年牛市中,last peak to new peak 所需最長時間係568日,約年半左右。依家話要等五年!唔駛吓話,橫行五年都唔識升?五年後金價似到頂玩完多過似冬眠瞓醒再創新高多D wor?

市場就係咁好玩,永遠都有不同意見,但最後只有自己俾錢落完注先算數,贏輸都自己負責,無得賴。

>>對話一
朋友B:喂!點解哩排D金唔識升嘅?
史密夫:嘩!之前升咗咁多,回番D都應該啫。
朋友B:咁仲要回幾耐ga?
史密夫:唔知呀,斷估都起碼要番一頭半個月啦吓話,一個唔覺意等足半年都唔奇wor。一個十年嘅大升浪,就算要調整一年半載好正常啫。大佬,你買咗好少金啫。我買多過你咁多,佢係咁跌我仲愁過你啦。
朋友B:咁推動黃金上升嘅基本因素同argument 冇變 ga ho?點解歐洲唔掂金都唔升嘅?
史密夫:D人鐘意美元多過黃金囉。
朋友B:但係美國都唔掂啫!
史密夫:我知呀,但係D人硬係鐘意美元多D我都冇法。依家唯有賭不久將來市場發現原來美國佬係皇帝的新衣啦。
朋友B:奇實我係想加碼,依家係唔係買貨嘅好時機呢?
史密夫:咁你問錯人wor。我嘅 market timing 極差,答唔到你。
朋友B:咁白银呢?
史密夫:白銀反而見底機會大D wor,跌咗八個月 la wor,高低位跌足五成,算好多la...不過幾時升得番上五十蚊就唔知啦,上個次等足兩年半先識創新高呀大哥,真係等到天荒地老,日月無光。不過我好明燈,况且silver 波幅太大啦,唔好買咁多。
朋友B:我知呀,我買咗好少啫,都唔敢買咁多。喂,仲有呢,樓市你點睇呀?
史密夫 (..嘩!.大佬,你係太多錢定係太得閒呀...): 喂,D餸嚟啦,要食嘢啦,遲D再傾。 (連隨熄電話...)

>>對話二
朋友L:喂!你D實金佔你個portfolio幾多%?
史密夫 (好問題,未計過,計計先...約十秒後):1% only!
朋友L:咁少!會唔會加多D比重?
史密夫:會呀,不過未買夾萬,因為諗唔到放個夾萬响邊。
朋友L:放响銀行保險箱咪得囉。
史密夫:拃實金都係驚世界大亂嗜,會唔會連保險箱裏面D金都俾政府充公ga?
朋友L:唔會啦,歐美先會有事,香港同亞洲好安全。驚ETF放响倫敦D金被充公好過啦。
史密夫:唔...都仲未諗掂放响邊,咁其實放响屋企都有機會俾人爆格嘅,諗諗先...

>>投資回報再創新低,皆因十月中反彈時理應减持候低位再補回,但我卻反其道高位追貨買到滿倉。金銀價依家未跌到九月尾彽位但我個組合回報已創新低,遲D如果金銀價格破底,咁咪輸到癲...呀...!!!

沒有留言:

張貼留言