2011年7月12日 星期二

要買得夠平,買得夠多,仲要坐得夠耐

講開歷史,去年十月十六日篇真人真事係未完嘅...
下集係講個師奶 (先開估:哩個師奶好明顯就係我亞媽啦!) 隔咗幾日,又愈諗愈唔對路啝,佢一心想買金,冇理由咁易俾人打殘。終於俾佢發現咗原來滙豐都有紙黄金買啝,於時就嗱嗱淋走去買金啦。當日價錢係每两港幣三千三百八十三蚊(又幾好意頭啝),折合美元大約每安士三百六十蚊左右 (哩個價錢依家睇番真係仿如隔世) 
我亞媽又真係聽教聽話, 咁多年嚟都冇賣過當日買嘅黄金,冇記錯好似04年仲買多D添,之後佢D金就一直坐到依家。
有一個好重要問題:點解佢可以坐咁耐呢? 响佢哩個case, 答案好簡單,因為佢買得少。 Absolute amount都唔大,所以冇放在心頭,雖然不至於唔記得,但銀碼就唔會影響佢日常嘅生活或將來嘅人生計劃,所以咁多年佢都冇乜留意過金價走勢。完全做到買完唔理,不聞不問。但如果一個人買好多錢貨,又或者好大部份身家都買咗落去,咁又可唔可以忍住坐咁耐呢?我諗佢必需要有超高嘅心理質素先得。

要買得夠平(有眼光),買得夠多(有膽量)仲要坐得夠耐(唔怕悶夠耐性) ,咁就有機會賺大錢啦。真係都知有幾難,the learning curve is long and steep, 我都仲努力學緊。

補充:咁多年嚟,我只係識得一個朋友可以用好多好多錢去買一隻股票然後揸足十年等佢升夠幾倍甚至十倍先賣。哩個朋友當然發咗達好耐啦,但眼光咁好EQ咁高嘅人真係萬中無一。好多人係因為坐艇而被迫做long term investor, 但因為think big而自願放棄短線相對小嘅利潤而去坐貨坐足幾年(期間要忍受無數起跌及沽貨獲利或跑輸止蝕嘅誘惑)去釣大魚嘅true long term investor實在少見。
咁都好合理嘅,賺錢咁易哩個世界又點會有咁多窮人呢?

沒有留言:

張貼留言