2011年6月19日 星期日

香港金礦股一覽

中外金礦股今年以來大大跑輸實金,有人話因為出現咗黃金ETF,多個渠道have exposure in gold and yet free of any operation hassle云云。我覺得ETF加大個餅啫,話ETF同股票係互相排斥就講唔通啦。睇番歷史,金礦股有時跑贏實金,有時跑輸,唔可以話有ETF所以金礦股就冇運行。

香港金礦股因為歷史短,選擇少,好股更少,所以都係小眾玩意。睇睇D股價先:
  六月十七日收市价年初至今六月至今
2840.HKSPDR ETF1,1578.1% (1.0%)
1818.HK招金16.684.9% (6.3%)
2899.HK紫金3.65(24.1%)(7.1%)
0246.HK瑞金8.86(34.6%)0.0%
2099.HK中國黃金國際28.9(31.2%)(19.8%)
3330.HK靈寶黃金5.07(26.0%)(14.5%)
1051.HK國際資源0.6811.5% (5.6%)

(重要啟事:下列嘅股票,我可能在不同嘅時間有長倉,短倉或冇倉位。我絕對冇與趣同大家透露我嘅持股或分享任何買賣策咯,我亦冇叫任何人買或賣下列任何一隻股票。)

紫金(2899): 同股東有仇。隻嘢當年好勁嫁!得佢一隻,龍頭國企,捨佢取誰?可惜唔知佢做乜賣金賣得好好地走去賣埋銅,冇個樣整個樣。香港gold mining sector咁細,pure play 有scarcity premium. 所以一定好過雜種。但佢硬係要消滅自己嘅優勢,以消除自身溢價,圢壓自已股價為己任,好似同股東有仇咁,你話係唔係奇聞吖。舊年仲整單"排毒"事件,管理層有幾"醒"即刻露底啦。大家先發覺原來以往只係美麗嘅誤會,咁仲唔分手咩。

但最大最大嘅問題係佢仲係年產中國十份一嘅黄金,it's still a major player and you simply can't ignore it. 於是每隔一排見佢跌到好殘,就會引起大家注意,諗住俾多次機會佢啦。於是同佢再復合,但發覺原來乜都冇變過,唯有再失望再分手,沒完沒了...

瑞金(246): 大家都仲等緊,等緊佢"...搜集進一步信息以回應聯交所的查問"...唔...答咗咁耐都未答完...D問題都應該幾難答。

中國黃金國際(2099): 上市不足一年,對佢認識唔深,冇乜睇法。但感覺上佢暫時最大嘅優勢係佢個名有"中國"兩個字,最大嘅concern係dual listing嘅股票從來都不太受重視。

靈寶黃金(3330): 公司有多於六成嘅利潤係嚟自冶煉。由於我仲未睇到靈寶在採礦業務上有任何強於同業嘅優勢,所以除非你與別不同咁對低利潤率嘅冶煉業務有濃厚嘅興趣,或有不便告人嘅難奇理由,否則長期持有哩隻股票嘅原因好大可能只係出於誤會。

國際資源(1051): 首先乜都唔駛講,先睇吓間嘢D董事先。嘩!有個猛人個名立即彈咗出嚟。你要做佢小股東,拍住D猛人一齊揾錢,唔該你照照鏡問問自己高唔高攀得起先?間公司响印尼開發緊一個金礦:開發緊就即係未有生產,要知道開礦就唔同開製衣廠,唔係六個月包搞掂。超支同延誤係非常普遍,絕對係高風險業務。印尼就唔駛講都知係外國投資者心中嘅高風險地區啦。簡單D講,國際資源俾機會你去高攀一班猛人响一個高風險地區經營一個高風險業務。要做佢股東?五個字講完: 藝高人胆大!

不可不提,有sell side 近期建議強力買入國際資源,原因你自己睇佢份報告啦。咁佢哋以前強烈推薦過瑞金,依家隻嘢停咗牌,但生意都要繼續做ga,點都要揾隻嘢嚟推嘅,都係揾食啫。

招金(1818): By elimination, 咁招金PE有乜辨法唔高先,有得揀咩?
所以呢,香港金礦股嘅困局就係好多人覺得招金PE太高,好貴。佢PE的確係高wor,但你會 option 1) 買隻會升嘅嘢,定係 option 2)買隻跌嘅" 嘢呢?大部份人選擇咗 option 3) 就係唔同佢玩。咁你話點算好呢?其實答案都好簡單: Give them some time! 當黄金進入牛三時 (i don't know when but it WILL happen),到時雞犬皆升,愈廢就愈升得勁,who cares about fundamentals? 到時就唔理平貴,最怕冇買!

須帶一提,港股終於跌到有D ,另人有少少想投降嘅感覺。 不過只係少少啫,仲未到絕望。雖然輸錢兼業績見紅唔好受,但技不如人死而無怨啦。樂觀D諗,你唔投降咁D Smart Money邊有平貨買呢,佢哋唔買又點會升喎。忍吓啦!

沒有留言:

張貼留言