2010年10月16日 星期六

黄金十問之一:點解要買黄金?

首先,一個投資者買黄金,唔表示佢唔可以同時買股票,買樓,甚至買郵票,買紅酒或其它資產。其實只要買到D會升值嘅資產就得啦。但我重注買黄金係因為如果出現貨幣危機,佢將會升得最多!但中外坊間一直有一班非常敵視黄金嘅人,一聽到黄金就好似見到毒藥咁。黄金嘅價格過去十年連連都升,一年都未跌過 (冇錯,就算係2008年遇上金融海嘯,你年頭買咗年尾賣番出去都有錢賺),但仍然有咁大班人敵視黄金。面對金價升足十年未跌過嘅事實(記住,係一個事實),真係有人會豎起隻手指念 "我睇佢唔到,我睇佢唔到!"  真係千古奇聞!!!
咁我當然好歡迎哩D反黄金嘅言論啦。因為我由此可知黄金牛市有排未完,每次大調整都係加碼嘅時機。

重要一提,我深信只要係好嘢,話之係乜,買得平又肯坐貨,長綫就實賺到錢。相反,過去十年如果響金市出出入入,唔肯坐定定,但trading技術又唔夠好,一樣會輸錢收場,或者只係賺得蠅頭小利。每個人都要為自己投資决定負責,同枱食飯,各自修行。

問題一: 點解要買黄金?

答案;如果個問題係十年前問嘅,答案可以係黄金以經跌咗好多,或者係市場開始對無錨貨幣失去信心(即所謂貨幣危機)等等。上網揾關於哩個題目嘅嘢有排睇。不過十年過後嘅今日問番相同嘅問題,雖然以上嘅答案都仍然啱,但有一個答案就簡單直接好多:因為黄金依家係處於一個牛市!

順帶一提,要抗衡通脹唔一定要買黄金,大原則係只要買D供應增長低於貨幣供應增長嘅資產就得, 買樓買股都可以抗通脹。但係萬一貨幣危機出現,咁黄金就一定跑贏九條街。

Question two: Why do you think gold is in a bull market?

Answer: Don't think, LOOK!!!

一幅圖勝過千言萬語。有邊樣資產嘅價格過去十二年連連升,一年都未跌過嘅? 黄金唔只係牛市,直情係超級大牛市!
(後補: Picture last updated on 29 Dec 2013)


問題三: 咁牛市都有完嘅一日,我又點知黄金依家唔係到咗頂呢?
答案;牛市到頂,必須有大量投資者參與,成為一種全民運動 (諗吓2000年嘅internt bubble就知何謂全民運動)。雖然報紙三日唔埋兩日就講吓D金價,但反黄金嘅言論都唔少啝。問吓自己,你身邊又有幾多人買咗黄金(或貴金屬)嚟投資呢? 答案好大可能係冇,最多一個起兩個止,但係絕冇可能係多於三個!莫講話散户,機構投資者都買得唔多啦!都唔夠多人玩,咁點爆呀!

沒有留言:

張貼留言